إحنا وأولادنا

إحنا بنعيش مع أولادنا مواقف صغيرة طول الوقت

طفل مش عايز يروح المدرسة

طفل شاطر جدًا في حاجة ومش عايز يكملها

طفل شايف إن الميس بتكرهه

طفل عمل حاجة غلط ومش عارف يقول لنا ليه

وأوقات إحنا نفسنا بنكون تعبانين، متعصبين، أو مش عارفين إيه أحسن حاجة نعملها

إحنا وأولادنا كتاب عن المواقف دي

مش عن الطريقة الصح للتربية، ولا عن جمل سحرية نقولها لأولادنا. هو محاولة نبص شوية قبل ما نجري للحل: إيه اللي الطفل شايفه؟ إيه اللي إحنا شايفينه؟ إيه اللي حصل فعلًا؟ وإيه اللي أضفناه وإحنا بنحاول نفهم؟

الكتاب مبني على سنوات من عملي في التدريب الصحي وتغيير السلوك، وعلى بحثي وكتاباتي في الملاحظة الإنسانية والظروف والعلاقات اللي بتأثر فيها، لكنه مكتوب للأهل بلغة بسيطة ومن قلب الحياة اليومية

لأن الطفل مش محتاج إننا نوافقه في كل حاجة، ومش محتاج يعيش من غير حدود أو خلافات أو أخطاء

لكن محتاج حاجة أبسط وأصعب في نفس الوقت

إنه يتشاف، ويكبر وهو لسه قادر يشوف نفسه