اسرار صناعة المحتوي

لو سألتني بعد أكثر من 12 سنة في صناعة المحتوى: "إيه أهم سر للنجاح؟" غالبًا هتتوقع إني أقول كاميرا أفضل، أو مونتاج احترافي، أو أسرار الخوارزميات. لكن الحقيقة إن ولا واحدة من دول هي السبب الحقيقي.

خلال رحلتي في المونتاج والإنتاج، وبعد تدريب أكثر من 4000 شخص، اكتشفت إن أغلب الناس بتسأل نفس الأسئلة: اجيب كاميرا إيه؟ أفضل برنامج مونتاج إيه؟ أنزل كام فيديو في الأسبوع؟ وإيه أفضل وقت للنشر؟ لكن نادر جدًا لما حد كان بيسأل السؤال الأهم: "أنا بفكر صح أصلًا؟"

من هنا بدأت أفهم إن المشكلة مش في نقص المعلومات، لأن المعلومات موجودة في كل مكان، لكن المشكلة في طريقة التفكير. شوفت ناس معاها أحدث الكاميرات وأغلى المعدات، ومحدش عرفهم. وفي المقابل، شوفت ناس بدأت بموبايل بسيط جدًا وقدرت تبني جمهور بالملايين “ بص على محتوي الناس علي تيك توك مثلا “ . وقتها فهمت إن النجاح في صناعة المحتوى عمره ما كان سباق معدات، لكنه سباق استمرارية.

الكتاب ده مش معمول علشان يعلمك إزاي تستخدم كاميرا، أو إزاي تعمل مونتاج احترافي، لأن الحاجات دي تقدر تتعلمها في أي مكان. هدفي من الكتاب ده إنك تغير طريقة تفكيرك تجاه صناعة المحتوى، لأن أول ما طريقة تفكيرك تتغير، هتلاقي كل حاجة بعدها اتغيرت. هتعرف تكتب سكريبت أفضل، وتصوّر بطريقة أذكى، وتمنتج أسرع، والأهم إنك هتعرف تركز على الحاجات اللي فعلًا بتصنع الفرق.

كل فصل في الكتاب ده عبارة عن درس اتعلمته من شغلي، ومن أخطائي، ومن التعامل مع آلاف صناع المحتوى. أتمنى إن كل درس يوفر عليك شهور أو حتى سنين من التجربة والخطأ. ولو خرجت من الكتاب ب ١٠ طرق غيرت طريقة شغلك، يبقى أنا حققت الهدف من الكتاب