نصف شخص

أي حد غيري " مش من عيلة إيناف " دلوقتي بالنسباله أهم مرحلة ؛ بيبدأ يذاكر ويفكر في مستقبله ويتمنى كلية يدخلها ويبذل فيها كل طاقته علشان يرضي نفسه وأهله قبله ، وأنا كل اللي بأيدي دلوقتي إنى أذاكر ؛ أذاكر وبس ، أذاكر وكل المدرسين رافضين يقبلوني ، أذاكر وأنا متأكدة إن كلها كام شهر وهفضل واقفة مكاني زي اللعبة اللي بطاريتها خلصت ، بس خلاص أنا أخدت قراري من زمان ، هكمل ولو معنديش طاقة ولا إمكانيات ، هكمل يمكن أقدر أهرب من المستقبل اللي منتظرني قريب أوي وأتكتب عليا من قبل ما أجي ، هكمل عشان في يوم أقول لخالتي " الكتاب اللي بحلئت عيني فيه كنت عارفة ومتأكدة إنه هينفعني “